Gjyqtari i Apelit të Vlorës, Petrit Aliaj është thirrur më 6 qershor të 2020 nga Komisioni i Vettingut, për ta njohur me rezultatet e verifikimit të tij, për ligjshmërinë e pasurive, pastërtinë e figurës dhe aftësitë profesionale.
Kjo është hera e katërt që KPK i kërkon gjyqtarit të paraqitet në seancë dëgjimore, teksa bëhet me dije se çështja e gjyqtarit Aliaj po shqyrtohet nga trupa gjykuese e përbërë nga Brunilda Bekteshi, Etleda Çiftja dhe Xhensila Pine, raporton Shqiptarja.com.
Seanca e 9 shkurtit, dështoi, pasi gjyqtari paraqiti një raport, ku thuhej se ishte sëmurë.
Gjithashtu, ka dështuar edhe një tjetër seancë dëgjimore, ajo e 5 marsit.
Komisioni i Pavarur i Kualifikimit kishte caktuar për herë të fundit datën 11 mars për zhvillimin e seancës dëgjimore, por gjyqtari nuk u paraqit, duke pretenduar se ishte shtuar në spital.
Komisioni i Vettingut ngriti dyshime të forta mbi vërtetësinë e gjendjes mjekësore të gjyqtarit Petrit Aliaj dhe i ka kërkuar Këshillit të Lartë Gjyqësorë të ngrejë një ekip, në bashkëpunim me Ministrinë e Shëndetësisë, për të ekzaminuar gjendjen e gjyqtarit Petrit Aliaj.
Petit Aliaj e ka nisur karrierën në drejtësi 25 vite më parë, teksa është shkarkuar në vitin 2004 nga Këshilli i Lartë i Drejtësisë për kryerjen e veprimeve që vijnë në kundërshtim me përmbushjen e rregullt të detyrës.
Më 2006 Gjykata e Lartë e riktheu në detyrë dhe në vitin 2015, Inspektoriati i Lartë për Deklarimin dhe Kontrollin e Pasurive e kallëzoi penalisht gjyqtarin Aliaj për fshehje pasurie.
Më 28 shator të 2015, Ministria e Drejtësisë, bazuar në dosjen e ILDKP, i kërkoi Këshillit të Lartë të Drejtësisë shkarkimin e gjyqtarit. KLD, në mbledhjen e 10 shkurtit të 2017, vendosi rrëzimin e kërkesës, ndërsa dosja e ILDKP është mbyllur nga prokuroria.
Prokuroria e Krimeve të Rënda, gjatë hetimit pasuror të Klement Balilit, i njohur edhe si ‘Eskobari i Balllanit’, i dënuar me 10 vjet burg për trafik droge, nxori në skenë edhe gjyqtarin Aliaj, i cili ishte paguar në vitin 2005 me 47 mijë dollarë nga vëllezërit Balili, si konsulent ligjor i tyre.
Petrit Aliaj ka ende një llogari të hapur me drejtësinë, pasi ka marrë pjesë edhe në gjyqin, ku pranua kërkesa për gjykim të shkurtuar të Dritan Dajtit, duke e shpëtuar atë automatikisht nga burgimi i përjetshëm.
Prokuroria kërkoi pushimin e çështjes, por Gjykata e Posaçme për Korrupsionin dhe Krimin e Organizuar e rrëzoi kërkesën e Prokurorisë së Posaçme.
