Dy ditë pas shpërthimit me eksploziv në kanalin e ujit Ibër-Lepenc në Zubin Potok, kryeministri i Kosovës, Albin Kurti, siguroi se institucionet e Kosovës po punojnë me dedikim për të siguruar furnizimin e pandërprerë me energji elektrike dhe ujë për banorët e prekur.
Ai theksoi se, megjithë pasojat e shpërthimit, institucionet dhe ndërmarrjet publike janë angazhuar për të garantuar sigurinë e furnizimit me energji dhe ujë të pijshëm për të gjithë qytetarët.
Ministrja e Ekonomisë, Artane Rizvanolli, në një video të shpërndarë nga Kurti, bëri me dije se një nga zgjidhjet e propozuara nga inxhinierët për sistemin e Ibër-Lepencit është duke funksionuar, duke siguruar një rrjedhje uji prej 3 mijë litra në sekondë, e cila është e mjaftueshme për furnizimin me energji të KEK.
Ajo shtoi se shpresohet që së shpejti të fillojë furnizimi me ujë për disa komuna.
Në një tjetër zhvillim, autoritetet e sigurisë në Kosovë kanë arrestuar tetë persona të dyshuar për përfshirje në sulmin ndaj kanalit.
Ata dyshohen për veprime kriminale dhe terroriste. Gjatë operacionit, janë sekuestruar më shumë se 200 uniforma ushtarake, armë dhe municion të ndryshëm.
