Një ngjarje e rëndë ndodhi mbrëmjen e djeshme në Tetovë, ku një spital mori flakë e për pasojë kanë humbur jetën 14 persona. Në një intervistë për emisionin “Breaking”, gazetarja Rita Behadini ka deklaruar se nga të dhënat zyrtare të Prokurorisë në spitalin e Tetovës kanë qenë të shtruar 26 pacientë.
Gazetarja ka thënë se ka pasur një debat në qeveri në lidhje me cilësinë e ndërtimeve të këtij spitali, pasi sipas saj materiali i ndërtimit është plastik. Ndër të tjera ajo ka shtuar se vajza e re që ka gjetur vdekjen së bashku me nënën e saj ishte e njohur në Tetovë, pasi punonte në një lokal si kameriere.
“Muaj më përpara ka pasur dyshime se ka pasur gabime në ndërtimin e këtij spitali modular. Nënë e bijë kanë ndërruar jetë për momentin. Ka pasur 35 shtretër, se sa kanë qenë pacientë nuk dihet, por nuk kanë pasur staf mjekësor. 26 pacientë, 14 viktima, 12 në spitalin e Tetovës”, theksoi gazetarja.
Kujtojmë se një zjarr përfshiu mbrëmjen e djeshme spitalin e Tetovës, ku humbën jetën 14 persona, ndërsa 12 të tjerë janë nxjerrë të gjallë dhe ndodhen jashtë rrezikut për jetën. Gjithashtu bëhet me dije se ata po marrin trajtimin e nevojshëm mjekësor. Ndërsa organet hetimore, janë vendosur në lëvizje për të zbardhur motivet e plota të tragjedisë së ndodhur në spitalin e Tetovës.
