Mbrëmjem e sotme Kryetari i Partisë Demokratike, Lulzim Basha ka reaguar menjëherë pas ngjarjes së rëndë në Durrës, ku kreut të FSHF-së, Armand Duka iu vendos tritol në derën e jashtme të banesës.
Kryedemokrati i ka bërë thirrje drejtësisë që mos të rrijë duarkryq.
“Zhvillimet rreth FSHF-së, tregojnë edhe njëherë degradimin e një pushteti të korruptuar që qëllim të vetëm ka zaptimin me çdo mjet, të çdo institucioni. Strategjia e tensionit e shpalosur ditën e sotme, që kulmoi me eksplozivin e vendosur këtë mbrëmje në banesën e familjes Duka duhet të ndërpritet me urgjencë dhe drejtësia të mos qëndrojë duarkryq.”, tha Basha.
Kujtojmë se ngjarja e rëndë ka ndodhur rreth orës 22:00 të mbrëmjes së sotme, në Durrës, ku banon edhe Duka. Vetëm kreu i FSHF-së është nisur me urgjencë nga Tirana drejt banesës së tij.
Paraprakisht raportohet se nga shpërthimi ka dëme materiale, kryesisht në portën e jashtme të shtëpisë. Nuk dihet ende nëse ka persona të lënduar.
Ndërkohë, gazetarja Klodiana Lala raporton se gjatë momentit të shpërthimit ka qenë në banesë vetëm bashkëshortja e Dukës.
Ky shpërthim vjen pikërisht sot kur Duka ka pasur dhe përballje të ashpër me kryebashkiakun Erion Veliaj, i cili i ka shpallur luftë dhe në gjykatë për zgjedhjet në FSHF, por ende nuk ka detaje që mund ta lidhin tritolin me këtë luftë të hapur.
