Gjatë natës në lagjen “Çlirim” në Berat është hedhur një sasi e vogël lëndë plasëse në lokalin e shtetasit Sali Fetiu.
Ngjarja ndodhi rreth orës 04:00 të mëngjesit dhe shkaktoi vetëm dëme të lehta në derën hyrëse të lokalit, i cili prej dy vitesh është i mbyllur.
Grupi hetimor po punon intensivisht për të sqaruar rrethanat e ngjarjes dhe për të identifikuar dhe kapur autorin ose autorët.
Në kuadër të hetimeve janë sekuestruar edhe filmimet nga kamerat e sigurisë së bizneseve përreth.
Dyshohet se ky akt mund të ketë lidhje me djalin e pronarit, 37-vjeçarin Asllan Fetiu, i cili më 24 mars 2024 plagosi me thikë një klient 85-vjeçar, Todi Biçakun, në lokalin përballë.
Ngjarja ndodhi pasi Fetiu, i dehur, kërkoi një person në lokal dhe pasi nuk e gjeti, sulmoi me thikë klientin e moshuar.
Policia bën me dije se hetimet nuk përqendrohen vetëm në këtë ngjarje, por po shqyrtohen edhe pista të tjera, përfshirë atë të larjes së hesapeve për pazare të prishura mes grupeve të bizneseve jashtë vendit.
