Një shpërthim me lëndë plasëse ka ndodhur gjatë mëngjesit të sotëm në qytetin e Vlorës.
Policia ka njoftuar se rreth orës 03:16 në lagjen “Hajro Çakërri” në pjesën e jashtme të banesës së shtetasit Tahsim Xheladin Banushaj 69 vjeç, ka shpërthyer një sasi e vogël lëndë plasëse, ku si pasojë ka vetëm dëme të vogla materiale.
Ndërkohë i pyetur nga AbcNews për ndonjë konflikt të mundshëm, Banushaj tha se nuk ka asnjë problem me njerëzit dhe si një kasap që ka qenë vetëm të tjerët mund ti kenë borxh atij.
“Ishim në gjumë ora 3 pa dhjetë. Dëgjojmë krismë. zhurmën e një dinamiti. Obobo tërmet i thashë gruas. Dolën gjitonit. Mora elektrikun dola lart nuk pashë asgjë. Kur erdha këtu pashë te dera. Nuk më shkon mendja te njeri. Dikush mund të më ketë ndonjë borxh por unë nuk i kam njeriu. Kam punuar si kasap. Ndonjë borxh, ndonjë kg mish. Fëmijët i kam të shpërndarë. Edhe mund të kenë ndërruar derë”, shprehet ai.
Njoftimi i policisë:
Më datë 30.10.2020, rreth orës 03:16, në lagjen Hajro Çakërri, Vlorë, në pjesën e jashtme të banesës së shtetasit Xh.B., 69 vjeç, ka shpërthyer një sasi e vogël lëndë plasëse, ku si pasojë ka vetëm dëme të vogla materiale.
Menjëherë në vendngjarje kanë shkuar forcat e Policisë dhe grupi hetimor ku vijon veprimet për sqarimin e rrethanave të ngjarjes, identifikimin dhe kapjen e autorit.
