Një shpërthim i madh ka ndodhur në një bazë ushtarake në Irak.
Ende nuk është konfirmuar shkaku i shpërthimit por se raportohet për dëme të mëdha materiale dhe persona të lënduar. Një person duket se ka humbur jetën dhe gjashtë të tjerë janë plagosur.
SkyNews citon dy burime të cilat konfirmojnë se ngjarja ndodhi si pasojë e një sulmi ajror.
SHBA ka distancuar veten nga sulmi, pasi një zyrtar amerikan ka deklaruar se vendi i tij nuk është i përfshirë.
Baza përdoret nga Forcat e Mobilizimit Popullor të Irakut (PMF), një grup prej dhjetëra grupesh të armatosura.
“Një shpërthim ndodhi në selinë e Forcave të Mobilizimit Popullor në bazën ushtarake Kalsu në distriktin al Mashrou në autostradën, në veri të Guvernatorit Babil. Në vendngjarje ka mbërritur menjëherë grupi hetimor, ku shpërthimi ka shkaktuar dëme materiale dhe të lënduar. Detajet do t’ju japim pasi të ketë përfunduar hetimi paraprak”, thuhet në njoftimin e bazës.
Baza është përdorur dikur nga forcat amerikane dhe është rreth 50 km në jug të Bagdadit. Shpërthimi në Irak vjen një ditë pasi Izraeli goditi Iranin.
