Një vullkan në gadishullin Rekjanes, në jugperëndim të Islandës, ka shpërthyer për herë të shtatë që nga dhjetori i kaluar, duke lëshuar lavë nga një çarje rreth 3 kilometra e gjatë.
Zyra Meteorologjike e Islandës dhe ekspertët kanë vlerësuar se shpërthimi nuk paraqet rrezik për transportin ajror, por autoritetet kanë paralajmëruar për emetime gazi në zonën përreth, përfshirë qytetin Grindavik, i cili ndodhet 50 kilometra nga kryeqyteti Reikjavik.
Rreth 50 familje u evakuuan menjëherë pas shpërthimit, ndërsa dëme janë raportuar në infrastrukturë dhe prona.
Edhe pse situata nuk konsiderohet kritike për Grindavikun, autoritetet mbeten vigjilente për çdo zhvillim të mëtejshëm./ REL
