Në një restorant në Ferizaj ka ndodhur një shpërthim i madh gjatë ditës së sotme. Si pasojë e tij, 41 persona kanë pësuar lëndime të ndryshme trupore, teksa 11 janë dërguar për shërim të mëtejshëm në QKUK në Prishtinë. Në mesin e të lënduarve janë edhe dy fëmijë.
Lajmin për rritjen e numrit të të lënduarve, në 41, e ka konfirmuar për mediat e Kosovës Major Qazim Reka.
Shpërthimi ka ndodhur në lagjen “The village” në Ferizaj, si pasojë e të cilit janë plagosur klientët.
Në vendin e ngjarjes ka mbërritur policia dhe ekipi mjekësor. Drejtori Rajonal në Policinë e Ferizajt, Emin Beqiri, ka konfirmuar se shkakui i shpërthimit që solli të lënduarit është një bombol e gazit në këtë lokal.
Beqiri tha se të plagosurit kanë pësuar lëndime të ndryshme trupore dhe në mesin e tyre janë edhe dy fëmijë. Po ashtu si pasojë e gjendjes së rënduar, 8 persona janë nisur në QKUK në Prishtinë.
Deri në orën 16:00, Drejtori i Spitalit të Ferizajit, Jeton Zeqiri, ka thënë se 24 pacientë kanë kërkuar trajtim në këtë spital si pasojë e shpërthimit që ka ndodhur, derisa 8 persona janë dërguar për trajtim në Qendrën Klinike Universitare të Kosovës. Por numri i atyre që po kërkojnë ndihmë mjekësore vijon të rritet.
“24 pacientë kanë ardhur në spital për shkak të shpërthimit të një bombole. 8 prej tyre janë dërguar në QKUK me djegie të shkallës së lartë, 4 prej tyre në bazë të ekzaminimit janë shumë të rrezikuar për jete, ndërsa 12 pacientë janë duke u trajtuar në spital. Ne jemi mobilizuar menjëherë për trajtimin e këtyre pacientëve”, ka thënë ai.
