Tre autobusë shpërthyen në Bat Yam, një qytet në jug të Tel Avivit, në një incident që autoritetet izraelite po e hetojnë si një “sulm të dyshuar terrorist”.
Në dy autobusë të tjerë u gjetën pajisje shpërthyese, të cilat fatmirësisht nuk u aktivizuan.
Forca të shumta policore u mobilizuan menjëherë në vendngjarje dhe po kërkojnë autorët e mundshëm, ndërkohë që ministrja e Transportit, Miri Regev, ka urdhëruar pezullimin e përkohshëm të transportit publik për kontrolle sigurie.
Kryeministri Benjamin Netanyahu ka reaguar duke urdhëruar një operacion të gjerë ushtarak kundër “qendrave të terrorizmit” në Bregun Perëndimor.
Ndërkohë, nuk raportohet për viktima, por imazhet e publikuara në rrjete sociale tregojnë autobusë të dëmtuar dhe tym të dendur pas shpërthimeve.
Zëdhënësi i policisë, Aryeh Doron, ka deklaruar se ekipet po vijojnë kërkimet për pajisje të tjera të mundshme dhe ka bërë thirrje për vigjilencë.
Në njërën prej bombave të pashpërthyera, me peshë 5 kg, ishte shkruar “Hakmarrja nga Tulkarem”, duke e lidhur me një operacion ushtarak të fundit në Bregun Perëndimor.
Në përgjigje të këtij sulmi, qeveria izraelite ka njoftuar masa të shtuara sigurie në qytete të ndryshme, ndërsa ministrja e Transportit ka ndërprerë vizitën e saj në Marok për t’u kthyer menjëherë në Izrael dhe për të koordinuar situatën.
