Policia e Durrësit ka arrestuar 30-vjeçarin me iniciale A.Dh., për shpërndarje të lëndëve narkotike.
Gjatë kontrollit fizik atij iu gjetën disa doza me heroinë dhe kokainë.
Më pas blutë kontrolluan edhe shtëpinë e 30-vjeçarit, ku gjetën 1 kg heroinë, 6.5 gr kokainë, qese me fara kanabisi dhe mjete për peshimin dhe ndarjes e drogës.
Sipas policisë, ky shtetas e shpërndante drogën gjatë fundjavës në lokalet e natës.
Materialet i kaluan Prokurorisë së Durrësit për veprime të mëtejshme.
Njoftimi i policisë
Durrës
Goditet një tjetër rast i shpërndarjes së drogave të forta.
Finalizohet operacioni policor “Weekend”.
Sekuestrohet 1 kg lëndë e dyshuar heroinë, doza me kokainë, fara kanabisi, peshore elektronike dhe një sasi parash, e dyshuar e përfituar nga aktiviteti kriminal i shpërndarjes së drogave të forta.
Vihet në pranga poseduesi, njëherazi dhe shpërndarësi i drogave.
Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, specialistët për Hetimin e Narkotikëve në Drejtorinë Vendore të Policisë Durrës, finalizuan një tjetër operacion policor, të koduar “Ëeekend”, në kuadër të të cilit u bë arrestimi në flagrancë i shtetasit:
- Dh, 30 vjeç, banues në lagjen Nr. 12, Nishtulla, Durrës.
Specialistët për Hetimin e Narkotikëve kishin marrë informacion në rrugë operative se shtetasi A. Dh. merrej me shpërndarje të drogave të forta, kryesisht në fundjavë, në lokale nate. Gjithashtu, ky shtetas përgatitej për të kultivuar bimë nakotike, pasi kishe siguruar një sasi farash kanabis sativa.
Gjatë operacionit, këtij shtetasi iu kapën në flagrancë gjatë kontrollit fizik, doza me lëndë narkotike kokainë e heroinë, të përgatitura gati për shitje.
Operacioni ka vijuar me kontrollin e banesës, ku shërbimet e Policisë gjetën dhe sekuestruan gjithsej, 1 kg heroinë, 6.5 gr. kokainë, një qese me fara kanabisi, një peshore elektronike dhe një sasi eurosh, paund e lekë shqiptare, të dyshuara të përfitura nga shitja e lëndëve narkotike.
Materialet do t’i kalojnë Prokurorisë pranë Gjykatës së Shkallës së Parë Durrës, për hetime të mëtejshme, për veprën penale “Prodhimi dhe shitja e narkotikëve”.
