Gjykata e Tiranës ka caktuar masën e sigurimit “arrest në burg” për katër të dyshuarit, Ergis Noka, Drin Vjerdha, Kristofor Pandelejmoni dhe Mario Çerra. Ata u arrestuan disa ditë më parë për shpërndarjen e lëndës narkotike sintetike, kryesisht ekstazi dhe MDMA, të cilat i shisnin në zonën e ish-Bllokut, kryesisht në lokalet e natës.
Përveç shpërndarjes së drogës, gjatë kontrolleve të kryera në zyrat e portalit ku ata punonin si gazetarë, janë gjetur pajisje që përdoren për trajtimin dhe prodhimin e lëndëve narkotike. Lëndën narkotike të ekstazisë, dyshohet se ata e siguruan përmes Kosovës dhe Serbisë. Çmimi i ekstazisë për shumicë ishte 10 mijë lekë, ndërsa çmimi për një tabletë të vetme arrinte deri në 30 mijë lekë.
Policia arriti të zbardhë aktivitetin kriminal të katër të dyshuarve përmes metodave speciale hetimi, si blerje të simuluara nga agjentët dhe vëzhgime në terren. Hetimet janë ende në vazhdim, ndërkohë që autoritetet po mundohen të zbulojnë më shumë detaje rreth rrjetit të shpërndarjes së drogës.
