Aktivisti Andi Tepelena ka denoncuar publikisht atë që e cilëson si një tjetër shpërblim elektoral për Noizyn, në formën e një koncerti që do të zhvillohet në Parkun e Liqenit Artificial të Tiranës.
Sipas Tepelenës, për organizimin e këtij eventi është parashikuar shkatërrimi i afro 43 mijë metrave katrorë gjelbërim, në një nga zonat më të mbrojtura të kryeqytetit.
Në koncertin ku do të performojë Noizy dhe DJ të huaj, priten të marrin pjesë rreth 20 mijë të rinj, ndërsa në hapësirën e parkut do të vendosen 200 tualete publike.
Megjithëse bileta për pjesëmarrje kap vlerën e 150 eurove, ende nuk ka asnjë informacion zyrtar se kush do të mbulojë dëmet mjedisore që ky aktivitet mund të shkaktojë në një nga zonat e vetme të mbetura të gjelbra në Tiranë.
Postimi:
Ja edhe shpërblimi elektoral për Noizyn: shkatërrimi i 42,934 metrave katrorë gjelbërim brenda perimetrit të të vetmes mushkëri të Tiranës, Parkut të Liqenit.
Më 31 maj do të performojnë Noizy dhe disa DJ gjermanë, ndërsa priten të mblidhen rreth 20 mijë të rinj shqiptarë dhe europianë, të cilët do të përdorin 200 tualete që do të instalohen në hapësirën e parkut.
Qytetarët nuk janë pyetur dhe shifra e investuar në këtë hapësirë të gjelbër nuk është bërë publike, në kundërshtim me detyrimet ligjore.
Bileta kushton 150 euro dhe përfitimi i shkon organizatorëve, por kush do të paguajë për dëmet mjedisore (nëse pas kësaj nuk i hapet rruga ndërtimit të kullave)? Noizy dhe DJ-t gjermanë?!
