Një bandë shqiptarësh është shpërbërë nga policia italiane.
Kjo bandë vepronte në zonën e Arezos, ku grabiste banesa.
Në pranga është vënë një 23-vjeçar, i cili dyshohet se qëndronte në krye të bandës.
Ai ka patur precedentë të mëparshme penale dhe jetonte në shtetin italian në mënyrë të paligjshme.
Ishin qytetarët ata që denoncuan grabitësit, pasi iu kishin vjedhur shtëpitë.
I riu shqiptar tentoi të arratiset me një automjet të vjedhur me dy bashkëpunëtorë, nga një shtëpi në Antria, afër Arezzos.
Kjo ishte një shtëpi përdorej nga grupi për të “planifikuar” vjedhjet që bënin ndër shtëpitë e komunitetit.
Policia e ka ndjekur për disa orë, derisa më në fund arriti ta kapte.
Dje, u dha masa e arrestit me burg vetëm për “kokën” e bandës, 23-vjeçarin shqiptar, i konsideruar një element me rrezikshmëri të lartë, me precedentë të theksuar kriminalë në fushën e trafikut të drogës dhe vjedhjeve.
Ndërkohë, policia po vazhdon hetimet, për të zbuluar edhe bashkëpunëtorë të tjerë të bandës.
