Pas lajmit se ish-deputeti Kastriot Islami u shoqërua në komisariat ditën e djeshme për shkak të mosmbajtjes së maskës në Liqenin Artificial, si dhe akuzave të Islamit se policia i shërben politikës dhe ka bërë presion kundrejt tij, ka reaguar Drejtoria Vendore e Policisë së Tiranës.
Me anë të një njoftimi zyrtar, Policia e Tiranës ka hedhur poshtë akuzat e bëra ndaj saj nga ana e ish-deputetit Kastriot Islami, duke pretenduar se policia ka zbatuar vetëm ligjin dhe aktin normativ, pas konstatimit pa maskë të Islamit teksa ky i fundit po ecte në Liqenin Artificial.
Sipas njoftimit dhe dëshmive të efektivëve prezent gjatë shoqërimit të Islamit, Drejtoria Vendore e Policisë së Tiranës, ka shpjeguar se ish-deputeti ka kërcënuar punonjësit e policisë me frazën “do ta shihnin pas 25 prillit, si të gjithë zagarët e Ramës”!.
Policia e Tiranës ka hedhur poshtë akuzat e Islamit se policia e ka shoqëruar atë politikisht, duke i quajtur akuzat e ish-deputetit si fabrikime.
Njoftimi i Policisë:
Drejtoria Vendore e Policisë Tiranë
Në mënyrë të përsëritur shtetasi Kastriot Islami është prononcuar publikisht me pretendimin që Policia e Shtetit e ka keqtrajtuar.
E vërteta është se ky shtetas ka keqtrajtuar punonjësit e patrullës policore me një fjalor shumë të ulët.
Kastriot Islami është ndaluar nga patrulla e Përgjithshme si një kalimtar pa maskë. Ai menjëherë ka lëshuar ndaj punonjësve të policisë fjalë të ulëta, duke pretenduar se ai ishte një figurë publike që nuk mund të ndalohej prej tyre. Madje shtetasi i ka kërcënuar punonjësit e policisë, që “do ta shihnin pas 25 prillit, si të gjithë zagarët e Ramës”!
Patrulla e policisë është detyruar ta shoqërojë atë në komisariat, ku janë kryer procedurat ligjore dhe i është komunikuar gjoba për mosmbajtjen e maskës mbrojtëse.
Duke hedhur poshtë akuzat e fabrikuara nga shtetasi Kastriot Islami për Policinë e Shtetit dhe shprehur keqardhjen për fjalorin e tij ndaj punonjësve tanë, gjejmë rastin të theksojmë se Policia e Shtetit nuk i shërben politikës por ligjit./GazetaReforma.com/
