Më herët ditën e sotme, kreu i qeverisë ka njoftuar se nga dita e nesërme, orari i lëvizjes do të jetë nga ora 05:00 e mëngjesit deri në orën 13.00 të pasdites dhe ky orar do të përdoret për të gjitha pikat e shitjes së ushqimeve, ilaçeve, shërbimeve bankare, por do të jetë edhe koha kur do të punojnë edhe punonjësit e administratës.
Ndërkohë, gjatë gjithë ditës së dielë, deri të hënën në orën 05.00, do të jetë gjithçka e mbyllur, në të gjitha qendrat urbane të Republikës së Shqipërisë dhe në rrugë do të jenë vetëm forcat e policisë, ushtrisë, njësive kritike të shërbimeve shtetërore dhe atyre të kompanive mediatike.
Kujdes! Rama ndryshon sërish oraret: ‘Ngrin’ çdo lëvizje pas drekës, të dielën nuk del askush
Në kuadër të këtyre masave, Shoqata e Bukës, Pastiçerisë dhe Brumrave ka njoftuar se të gjithë qytetarët se furrat do të jenë të hapura nesër nga ora 05.00 e mëngjesit deri në orën 13.00, për tu hapur sërish të hënën.
Po ashtu, të gjithë furrat e bukës do të shtojnë prodhimin në mënyrë që qytetarët të marrin bukë për dy ditët në vazhdim pasi do jenë mbyllur nga ora 13.00 e ditës së nesërme deri të hënën në orën 05.00 të mëngjesit.
“Kryeministri Edi Rama pasditen e sotme bëri një njoftim që është shumë i rëndësishëm për të gjithë prodhuesit e bukës. Duhet të prodhojmë më shumë bukë, sepse shërbimi i shitjes të furrave të bukës do të jetë nga ora 5:00 e mëngjesit deri ne orën 13:00 të drekës, pas kësaj ore për të gjithë kohën e pasdites , dmth nesër që është e shtunë dhe gjithë ditën e diel nuk do ketë furrë buke të hapur.
Furrat bukës do të hapen vetem ditën e hënë në orën 5 të mëngjesit. Ky është urdhri i Kryeministrit për këtë fundjavë, prandaj të gjithë ne të sforcuar duhet të prodhojmë që të përballojmë fluksin dhe kërkesat e klientëve në mënyrë që familjet të marrin bukë edhe për pasnesër. Qofshi mirë dhe ta kalojmë sa më lehtë këtë situatë” thuhet në njoftimin e Shoqatës së Bukës, Pastiçerisë dhe Brumrave.
Numri total i viktimave në rang botëror deri tani është 11, 299 persona dhe janë 271, 670 të infektuar në 183 vende, teksa deri tani në vendin tonë kanë humbur jetën 2 persona dhe janë infektuar 70 të tjerë, teksa në Kosovë janë 22 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
