Elsa Dhako, 30 vjeçe, nga qyteti i Pogradecit dhe nënë e tre fëmijëve përkatësisht 11, 7 dhe 5 vjeç ishte pjesë e emisionit “Historia ime” në Tv Klan, ku rrëfeu për jetën ekstremisht të vështirë që ka kaluar. Ajo tregon se i është futur rrugës së prostitucionit e detyruar nga rrethanat. Kishte një djalë nga martesa e parë dhe duhej të kujdesej për të.
Ishte mes katër rrugëve, pa shtëpi dhe nuk kishte para as për të ngrënë bukë. Kështu u detyrua që tek lokali që punonte si kamariere të ushtronte prostitucionin. Elsa tregon se nuk e di as kush janë baballarët e dy vajzave që ka.
Mirela Milori: Kalon më nga ai lokal?
Elsa Dhamo: Jo nuk kaloj, as nuk ia hedh sytë fare.
Mirela Milori: Po ish-pronaren?
Elsa Dhamo: Jo fare, sepse e di se çfarë kanë bërë me jetën time. Unë kam rënë në duart e gabuara dhe nuk më bën përshtypje ta takoj.
Mirela Milori: Ushtrohej dhunë ndaj teje në atë periudhë?
Elsa Dhamo: Ushtronin dhunë, shyqyr që nuk më ngelnin shenjë.
Mirela Milori: Mbante shumë vajza të tjera si ty?
Elsa Dhamo: Po shumë vajza, ka pasur vajza të moshës 12-13 vjeçe, i mbante dhe vazhdon akoma t’i mbajë. Kur shikoj një shoqen time më dhemb shpirti sa s’ka. Atë e ka përzënë e ëma dhe fle aty ku punon. U bë gati një vit që nuk dal më, jam shkëputur sepse më janë rritur fëmijët.
Mirela Milori: Po vajzat kur erdhën në jetë, gjatë kohës kur ti punoje aty?
Elsa Dhamo: Po kur punoja aty ngelesha shtatzënë.
Mirela Milori: Kush është babai i tyre?
Elsa Dhamo: Nuk e di.
Mirela Milori: Ke ndonjë ide kush mund të jetë babai biologjik?
Elsa Dhamo: Jo.
Mirela Milori: Po nëna jote e dinte se ç’po bëje ti?
Elsa Dhamo: Po e dinte shumë mirë. Më ka thënë bëj ç’të duash ke jetën tënde. Prapë e dua se e kam nënë. Është martuar, por nuk më ndihmon aspak. Ne jemi 4 motra dhe një vëlla. Motrat janë në gjendje shumë të mirë, edhe vëllai po ashtu, ndërsa unë jo.
