Shëndetësia shqiptare po zhytet çdo ditë e më shumë në kaos dhe në skandale të njëpasnjëshme. Skandali i radhës vjen nga Qendra Spitalore Universitare “Nënë Tereza”, ku me një email zyrtar është urdhëruar ndalimi i analizave laboratorike për pacientët, pasi është tejkaluar buxheti mujor i koncesionarit privat që menaxhon shërbimin.
Gazetari Osman Stafa ka publikuar dokumentin tronditës, i cili konfirmon se në spitalin më të madh të vendit jeta e pacientëve kushtëzohet nga “tavani financiar”.
Në emailin e QSUT thuhet:
“Përshëndetje,
Në zbatim të nenit 22.4 të kontratës së partneritetit publik-privat për ofrimin e shërbimit të laboratorëve ju bëjmë me dije se tarifat e shërbimeve të pagueshme të koncesionarit për QSUT “Nënë Tereza”, ka arritur 100% të tavanit buxhetor mujor. Ju kujtojmë se në bazë të nenit 22.4.3 të Kontratës Koncesionari do të ofrojë analizat urgjente deri në arritjen e vëllimit prej 5% të vëllimit të analizave urgjente të kryera.
Në vijim ju tërheqim vëmendjen për mungesën e monitorimit të buxheteve nga ana juaj dhe e stafit në varësi dhe si rrjedhojë edhe për moszbatimin e tyre.
Që prej datës 25 Gusht – 1 Shtator do të ofrohet shërbim laboratorik për rastet urgjente dhe shumë të rënda. Për çdo rast do të dërgohet email i detajuar dhe i argumentuar nga mjeku kurues tek Zv/D Drejtori i Përgjithshëm Teknik i PAI-t, i cili do të konfirmoj nëse do të procesohet në laborator kërkesa.
Sa më sipër, brenda orës 14:00 do të përcillni shërbimet që kanë tejkaluar buxhetin e alokuar në PAI-n tuaj.
Lutem në vëmendje,
Qendra Spitalore Universitare “Nënë Tereza”
Ky është një dokument zyrtar që tregon hapur realitetin dramatik: analizat ndalen sapo tejkalohet buxheti, duke vënë jetën e pacientëve në rrezik.
Gazetari Osman Stafa reagoi me tone të ashpra:
“A mund të më gjeni një spital në botë, me një situatë si QSUT? A ka logjikë që të ndërpriten analizat për pacientët, nëpër spitale? Ndodh, dhe askush nuk flet. Askush! Nga njëra anë shteti, ministria e shëndetësisë s’ka para për analizat, për pajisje, për ilaçe, e nga ana tjetër harxhojnë lekë për të larë makinat 10 mijë euro në muaj, harxhojnë miliona euro për inceneratorë që nuk ekzistojnë, harxhojnë miliona euro për kopshtin ‘Eden’, e nuk harxhojnë për shëndetin e shqiptarëve.”
Ky nuk është rasti i parë skandaloz në shëndetësinë shqiptare, por është një dëshmi tjetër se sistemi publik po degradohet në mënyrë të frikshme. Nga mungesa e ilaçeve, aparaturave dhe kushteve minimale, deri te ndalimi i analizave bazike për pacientët, çdo ditë dalin në pah prova të reja të një sistemi të kapur nga koncesionet dhe nga paaftësia e qeverisë për të mbrojtur jetën e qytetarëve.
Skandalet e njëpasnjëshme në shëndetësi po tregojnë se jeta e shqiptarëve është lënë pas dore, ndërsa paratë publike shkojnë për tendera luksi dhe projekte fantazmë.
