Në emisionin “Koha për t’u zgjuar” ishte e ftuar mjekja kardiologe Eva Duraku, e cila sqaroi ndikimin që temperaturat e ulëta kanë në shëndetin kardiovaskular.
Ajo theksoi se i ftohti ndikon ndjeshëm në rritjen e tensionit të gjakut, duke shtuar rrezikun e komplikacioneve kardiake si infarkti dhe krizat hipertensive.
“Që nga fundi i dhjetorit kemi parë një shtim të rasteve me infarkt dhe kriza hipertensive. I ftohti shkakton ngushtimin e enëve të gjakut, duke rritur kontraktilitetin dhe vlerat e tensionit. Prandaj, këshillohet që njerëzit, sidomos të moshuarit, të masin më shpesh tensionin dhe të shmangin daljet herët në mëngjes dhe natën, kur temperaturat janë më të ulëta,” u shpreh Duraku.
Në rast të vlerave shumë të larta të tensionit, mbi 16, ajo rekomandon konsultimin e menjëhershëm me mjekun kardiolog ose atë të familjes, për të bërë ndryshime në skemën e mjekimit ose për të rritur dozën e medikamenteve nëse është e nevojshme.
Si masë të shpejtë për uljen e krizave hipertensive, mjekja përmendi përdorimin e medikamentit Kaptopril, i cili mund të merret i shtypur poshtë gjuhës në rastet kur tensioni është shumë i lartë.
Ajo theksoi se ky ilaç duhet të përdoret vetëm nga pacientët që nuk kanë alergji ndaj tij dhe pas konsultimit me mjekun.
Duraku përfundoi me një apel për kujdes të shtuar gjatë periudhave me temperatura shumë të ulëta, duke këshilluar të moshuarit të kufizojnë daljet në ambient të hapur kur është shumë ftohtë.
