Në orët e para të mëngjesit të sotëm, në qytetin E Burrelit janë gjetur dy makina të shkrumbuar në flakë. Nga hetimet paraprake, është arritur në përfundimin se zjarri ka nisur tek mjeti “BMV X5” më pas flaka është përhapur edhe tek një Benz i cili ishte në afërsi të makinës së parë.
Mësohet se makina “BMV X5” është e futbollistit matjan Donald Mëllugjas, i cili është pjesë e Kastriotit dhe ka qenë pjesë e Partizanit dhe Bylisit në Superiore. Pas djegies së makinave, policia ka shkuar në vendin e ngjarjes dhe ka nisur hetimet e mëtejshme për të bërë zbardhjen e plotë të rastit.
Njoftimi i policisë:
Me datë 24.12.2021, rreth orës 01.40, në një parkim në lagjen ‘Partizani’, ka marrë flakë automjeti tip ‘BMW’, në pronësi të shtetasit D. M., dhe si pasoje ka marrë flakë dhe një automjet tjetër tip “Benz”, që ishin të parkuara. Grupi hetimor ndodhet në vendin e ngjarjes dhe po hetohet për zbardhjen e shkaqeve të kësaj ngjarjeje.
Donald Mëllugja është një nga lojtarët që u afrua te Kastrioti në merkaton e verës. Mëllugja është një vlerë e shtuar në qendër të mesfushës, teksa trajnerin Ndreu e kërkonte prej kohësh. Mëllugjas ka spikatur në dy sezonet e tij me Bylisin ne Superiore, duke luajtur 32 ndeshje nga sezoni i kaluar dhe 12 në sezonin aktual.
