Policia e Kuçovës ka arrestuar një 52-vjeçar, pas dëshmisë tronditëse që ka bërë gruaja e tij në spital.
49-vjeçarja mbërriti në spitalin e Beratit në gjendje të rëndë për jetën pasi kishte konsumuar fostoksinë, pas dhunës së ushtruar sistematike nga bashkëshorti.
Specialistët për Hetimin e Krimeve në Komisariatin e Policisë Kuçovë arrestuan në flagrancë shtetasin P. P., 52 vjeç, banues në Kuçovë.
“Piva fostoksinë të vdes, nuk mund të duroja dot më. Burri më dhunon”, mësohet se ka thënë ajo.
Më pas gruaja është transportuar në QSUT, për ndihmë më të specializuar.
Materialet i kaluan Prokurorisë pranë Gjykatës së Shkallës së Parë Berat, për veprat penale “Dhuna në familje” dhe “Shkaktimi i vetëvrasjes”.
