Vijon të rritet bilanci i të infektuarve dhe viktimave nga COVID-19 në Greqi, teksa mediat fqinje raportojnë se këtë të diel ka shkuar në katër numri i personave që kanë humbur jetën.
Raportohet se viktima e fundit është një 53-vjeçar, punonjës në Spitalin e Kozanit, i cili ishte i shtruar në spitalin AHEPA prej disa ditësh.
Viktima e parë ishte një 92-vjeçar nga Ptolemiada, i cili u shtrua në spital pasi doli pozitiv me Coronavirus, teksa të enjten një 66-vjeçar humbi jetën në Patra, e pas tij një 67-vjeçar nga ishulli Zakinthos ndërroi jetë në të njëjtën ditë.
Numri i të infektuarve në Greqi ka arritur në 280, ndërsa autoritetet kanë mbyllur shkollat dhe universitetet, si masë për të parandaluar përhapjen e Coronavirusit.
Në rang botëror janë 157,188 persona të infektuar dhe janë regjistruar 5,839 viktima, teksa në Itali situata vijon të jetë dramatike me 21,157 persona të infektuar dhe 1,441 viktima.
Në vendin tonë për një javë janë regjistruar 38 të infektuar dhe 1 viktimë, teksa në Kosovë janë 5 të infektuar.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
