Një ngjarje e rëndë është regjistruar në Shkodër, ku një çift bashkëshortësh janë gjetur të vdekur brenda banesës së tyre. Dyshohet se ngjarja është krim brenda familjes, ku 79-vjeçari Fadil Bandulla ka qëlluar për vdekje me automatik bashkëshorten e tij, 83-vjeçaren Sanije Bandullën dhe më pas edhe veten.
Ngjarja është regjistruar në lagjen “Ahmet Haxhia” dhe dyshohet të ketë ndodhur para katër ditësh, por trupat u zbuluan sot nga forcat e policisë, pas denoncimit të familljarëve të çiftit të bashkëshortëve pasi nuk kishin mundur të kontaktonin dot me ta.
Nuk dihen ende rrethanat e kësaj ngjarje dhe as nëse dy të moshuarit kanë pasur konflikte më parë, ndërsa më shumë të dhëna prite të dalin në minutat në vijim. Në vendngjarje ka shkuar policia dhe ka nisur hetimet për sqarimet e plotë të rrethanave të kësaj ngjarje.
Njoftimi i plotë:
Shkodër/ Informacion paraprak
Sot me datë 18.08.2021 në lagjen “Ahmet Haxhia”, Shkodër, dyshohet se shtetasi F. B., 79 vjeç në banesë ka vrarë me armë zjarri bashkëshorten e tij shtetasen S. B., 83 vjeçe dhe më pas ka vrarë veten.
Në vendngjarje është gjetur dhe sekuestruar në cilësinë e provës materiale arma e zjarrit automatik me të cilën dyshohet se shtetasi F.B ka varrë bashkëshorten dhe më pas veten .
Nga veprimet e para hetimore dyshohet se ngjarja ka ndodhur para disa ditësh. Grupi hetimor nën drejtimin e Prokurorisë Shkodër, vijon punën për sqarimin e plotë të rrethanave të kësaj ngjarjeje.
