Autoriteti i Konkurrencës publikoi sot përfundimin pas mbylljes së një hetimi thuajse një vjeçar që në fokus kishte pesë kompanie të prodhimit dhe tregtimit të miellit. Bëhej fjalë për “Agro Blend SHPK”; “Miell Tirana SHA”; “Bloja SHA”; “Atlas SHA” dhe Atlas Mills SHPK. Në njoftimin e publikuar nga AK, thuhej se u dol në përfundimin se këto kompani janë marrë vesh me njëra-tjetrën për të ndarë tregjet dhe për të caktuar sasinë e prodhimit që do të hidhnin në treg, duke krijuar kështu një kartel.
Autoriteti i Konkurrencës u mjaftua me vetëm një paralajmërim për këto shkelje të rënda që minojnë konkurrencën e lirë dhe dëmtojnë konsumatorin, ndërkohë që gjoba do të ishte ndëshkimi më i pakët.
Për më tepër, AK del në përfundime në një kohë kur çmimi i bukës është rritur për shkak të rritjes së çmimit të miellit, duke rënduar kështu xhepat e qytetarëve, të detyruar të shpenzojnë për një produkt bazë.
Në vendimin e këtij viti, nuk ka ndonjë ndryshim të madh nga vendimi i vitit të kaluar, ku AK thotë se do t’i monitorojë kompanitë e sipërpërmendura. Mirëpo, duke mos dhënë asnjë shpjegim pse kompanitë nuk janë gjobitur që vjet, por u lanë të lirë të bënin si donin, AK bën me dije se edhe një vit më vonë, nuk ka marrë ende një vendim nëse do t’i gjobisë apo jo.
Ndërkohë, çmimi i bukës në furra është rritur të paktën me 10-20 lekë dhe është e dukshme dhe kompanitë nuk i kanë marrë aspak parasysh “këshillat” e Autoritetit të Konkurrencës, dhe kanë vazhduar me shkeljet.
