Pamjet që vijnë nga zona e quajtur “Rezidenca e Kodrës së Diellit” në kryeqytet vërtetojnë edhe një herë masakrën që po i bëhet mjedisit shqiptar, ku prej kohësh autoritetet ia kanë shitur atë kompanive private.
Kjo zonë po gërryhet nga dita në ditë, teksa duket se shkatërrimi i mjedisit bëhet me një nxitim të tepërt pasi punimet vijojnë edhe natën.
Ndonëse, sipas RTV ORA, në këtë zonë banon edhe kryebashkiaku i Tiranës, Erion Veliaj, puna vijon normalisht dhe atij nuk i bën përshtypje asgjë.
Nga ana tjetër, banorët ankohen se gërryerja ua ka vështirësuar jetën, teksa kërkojnë ndërhyrjen e institucioneve përgjegjëse.
Madje, rreth dy javë më parë ata protestuan për problemet e ujërave të zeza, pasi gjithë zona u kthye në terren të vështirë për të jetuar.
Po ashtu, banorët ankohen për baltë dhe rrugë që nuk janë të denja as për një qytet të vogël periferik, duke kërkuar ndërhyrje urgjente.
Megjithatë, duke marrë parasysh gjithë panoramën që na serviret nga gjithë vendi me masakrat mjedisore që po kryehen dita-ditës, shpresat se zëri i tyre do dëgjohet janë të pakëta.
Disa javë më parë, u raportua se në dy monumente natyrore Kanioni i Gjipesë dhe Bokërrimat e Vunoit, ushtrojnë aktivitet të jashtëligjshëm, guroret e firmës Gjikuria.
Po ashtu, gërryerjet janë denoncuar edhe në shtretëritë e një sërë lumenjsh, siç është lumi Mat, i cili është gllabëruar nga kompania “Salillari” dhe “Ndue Kola Mountains”.
Prej kohësh mediat kanë raportuar skandale të ndryshme që lidhen me shkatërrimin e mjedisit, kryesisht lumenjve, ku siç duket shteti nuk vë më dorë duke i lënë në harresë totale.
Problematikë e mprehtë mbetet edhe ndotja e këtyre lumenjve, që nga një mundësi e madhe turistike janë kthyer në vende të ndotura, që mbi të gjitha rrezikojnë jetën e banorëve.
