Një subjekt tregtar është gjobitur me 100 mijë lekë, pasi skafi në pronësi të tij u konstatua duke hedhur mbeturina në det dhe duke lundruar në mënyrë të paligjshme pranë vijës bregdetare në plazhin e Dhërmiut.
Policia Kufitare e Dhërmiut, në bashkëpunim me Njësinë Policore Detare, ndërhyri menjëherë pas një denoncimi nga pushuesit, të cilët raportuan se mjeti lundrues po ndotej detin dhe po qëndronte në afërsi të bregut, në kundërshtim me perimetrin e sigurisë ujore.
Pas verifikimeve, autoritetet vendosën masë administrative ndaj subjektit tregtar për shkelje të nenit 24/c të ligjit nr. 43/2020, që ndalon zhvillimin e aktiviteteve jashtë zonave të kufizuara në det.
Ndërkohë, drejtuesi i mjetit lundrues, shtetasi G. I., 25 vjeç, u procedua penalisht në gjendje të lirë për veprën penale “Ndotja e ujërave”, pasi rezultoi se kishte hedhur mbeturina në det gjatë pastrimit të skafit.
Policia bën thirrje për respektimin e rregullave të sigurisë në zonat ujore dhe ruajtjen e mjedisit detar, duke theksuar se shkeljet do të ndëshkohen sipas ligjit.
