Komisioni i Posaçëm i Apelimit ka shkarkuar sot nga detyra kreun e Gjykatës së Lartë, Xhezair Zaganjorin. Në këtë mënyrë Zaganjori është lënë përfundimisht jashtë sistemit të drejtësisë.
Sipas komisionit të sotëm, Zaganjori ka kryer deklarime të pasakta për pasurinë e tij dhe se nuk ka burime të ligjshme për këtë pasuri.
Nisur që nga dita e sotme, Gjykata e Lartë mbetet me një gjyqtar dhe ai është Ardian Dvorani. Ky i fundit është zgjedhur njëherësh edhe Kryetar i Këshillit të Emërimeve në Drejtësi.
Dvorani do të ketë kompetencat e përkohshme të kryetarit, deri në emërimin e një kryetari të ri të Gjykatës së Lartë. Kujtojmë këtu se Dvoranit i ka mbaruar mandati që në vitin 2014, por sipas ligjit ai mund të qëndrojë në detyrë deri kur të zëvendësohet nga dikush tjetër.
Përsa i përket shkarkimit të Zaganjorit, kreu i Gjykatës së Lartë nuk ka arritur dot që t’i bindte anëtarët e komisionit edhe pse ai është shprehur edhe më parë në daljet e tij në media, se dokumentet dhe provat që ai ka dorëzuar, ishin të shumta në numër dhe të mjaftueshme.
Pasaktësi dhe shumë pikëpyetje u ngritën me të ardhurat për blerjen e apartamentit, shkollimin e fëmijëve apo dhe shkollimin e djalit të tij në Londër. Pikëpyetje janë ngritur edhe në lidhje me pasurinë që zotëron bashkëshortja e tij.
Të dhënat e analizuara tregojnë se Zaganjori zotëronte një pasuri familjare prej 13.9 milionë lekësh në vitin 2003-kur deklaroi për herë të parë pasurinë.
Në fund të vitit 2017, pasuria familjare e Zaganjorit është rritur me katër herë, duke kapur vlerën e 58.7 milionë lekëve. Ajo përbëhet nga 40.8 milionë lekë likujditete në bankë, 16.9 milionë lekë pasuri të paluajtshme dhe 900 mijë lekë kursime në cash.
Të ardhurat familjare të Zaganjori për periudhën deklaruese 2004-2017 kapin në total vlerën e 99.7 milionë lekëve.
Në datën 17 korrik, Zaganjori u shpreh se ishte tepër i qetë dhe se po priste fundin e hetimeve të tij, pasi ligji duhet respektuar.
“Duhet të presim që Kolegji i Apelimit të marrë në shqyrtim pretendimet e mia dhe Komisionerit Publik. Si unë si ju do të presim datën 26 për të marrë përgjigje. Unë theksova faktin se gjatë hetimit administrative, edhe gjatë gjykimit në seancë, dokumentet që janë kërkuar nga Komisioneri Publik unë i kam dhënë.
Unë paraqita dokumentet dhe menjëherë më datë 10 korrik, dsia prej tyre janë cilësuar sikur s’kanë vlerë. Ata kanë vlerë, kanë vula, unë mendoj se duhet të merren në konsideratë. Ai që vendos është Komisioneri Publik”, u shpreh Zaganjori në deklaratën e 17 korrikut.
“Ka më shumë se 1 vit që jam në proces vettingu. Sigurisht që synohet të bëhet reformë dhe ne kemi për detyrë që të respektojmë këtë proces.
Unë nuk e ndjej veten në presion. Gjykata e Lartë nuk funksionon për shkak të proceseve që dihen. Unë do të rri në atë zyrë për sa kohë më lejohet me ligj.
Për shkak edhe të funksionit që kam, unë jam munduar që të jem i qartë dhe i drejtpërdrejtë në përgjigjet që kam dhënë. Procesin nuk e vlerësoj dot unë.”, deklaroi më tej Zaganjori.
Kujtojmë se Zaganjori u konfirmua në detyrë më 24 korrik 2018, pavarësisht problemeve me pasurinë. Komisioni i Pavarur i Kualifikimit konstatoi se Xhezair Zaganjori shmangu tatimet dhe gënjeu për pronat.
