Vetting-u në universitete nuk ka qenë një kërkesë e ngritur në ajër, por mesa duket studentët e kanë zbatuar seriozisht. Bëhet fjalë për Universitetin Bujqësor të Tiranës, ku shumë student kanë denoncuar tek rektori abuzimet, korrupsionin dhe ngacmimet seksuale që kanë pasur nga pedagogët.
Pikërisht për këtë arsye, rektori, Prof. Bahri Musabelliu, ka folur për Ballkanweb duke thënë se është duke u bërë maksimumi që problemet e ngritura nga studentët të protestë,të zgjidhen.
“Ne i kemi marrë në konsideratë në maksimum shqetësimet e studentëve gjatë ditëve të protestës, e cila ka qenë një periudhë relativisht e gjatë”,- thotë Prof. Bahri Musabelliu.
Një pedagog i akuzuar nga studentët për ngacmim seksual dhe 3 të tjerë janë shkarkuar nga detyra ndërsa për dy po kryhen ende verifikimet.
Pedagogu i akuzuar nga studentët për ngacmim seksual prej 10 vjetësh jepte mësim në Fakultetin e Mjekësisë Veterinare. Një grup studentësh denoncuan veprimet e turpshme të pedagogut të tyre, akuza që u vërtetuan nga komisioni i etikës.
“Pedagogu në fjalë, është e vërtetë, unë kam pasur indicie nga studentët për këtë gjë. Më kanë ardhur disa vajza dhe disa djem studentë, të cilët mi kanë bërë shqetësimet e tyre prezent. Vetë kam shkuar disa herë në fakultetin e Mjekësisë Veterinare. Zhvilluam edhe një anketë me studentët ku morëm indicie që ishte e vërtetë. Është mbledhur komisioni i etikës ku kanë marrë vendimin për pushimin nga puna të pedagogut për sjellje të pahijshme”,- tha rektori.
Shitjeve e librave, paaftësia akademike apo mitmarrja ka hequr nga puna disa pedagogë në Universitetin Bujqësor të Tiranës
“Kemi pasur shumë indicie nga studentët me problematika që lidhen me shitjen e librave me detyrim nga ana e pedagogëve. E kemi edhe të filmuar, pedagogu në fjalë është kapur duke shitur tekste. Një pedagog tjetër e kemi pezulluar për arsye që lidheshin me aftësitë e tij akademike, pasi tekstet e tij studentët nuk i kuptonin tekstet e tij, i përkthente me Google Translate. Ka pasur edhe akuza të studentëve për mitmarrje”,- vijon Bahriu.
