Një aksident i rëndë ndodhi disa ditë më parë në Qafqën e Muzinës, ku humbën jetën 5 persona. 22-vjeçarja që shkaktoi aksidentin tragjik, Rexhina Çelhaka është lënë në burg ditën e sotme. Mësohet se trupi gjykues ka vendosur masën e sigurisë “burg pa afat”, për 22-vjeçaren. Ajo ka dalë nga spitali, pasi mbeti edhe vetë e plagosur dhe është transportuar në ambientet e institucionit të ekzekutimit të vendimeve penale në Tiranë pranë burgut të grave.
E reja po udhëtonte me dy mikeshat e saja drejt Sarandës, kur në Qafën e Muzinës i preu rrugën furgonit me pasagjerë.
Për pasojë mjeti ra në greminë dhe pesë persona humbën jetën. e vetmja e mbijetuar ishte një 25-vjeçare shtatzënë. E plagosur mbeti edhe vetë Çelhaka me dy vajzat që ishin pasagjere në “Land Rover”, por tashmë kanë dalë nga spitali dhe ndodhen në gjendje të mirë shëndetësore. Policia ka konfirmuar po atë ditë se pesë persona humbën jetën, pasi furgoni ra në humnerë.
Viktimat janë shoferi i furgonit, Bardhi Prodo, 51 vjeç dhe një çift të moshuarish Fiqiri dhe Drita Korçari, përkatësisht 77 dhe 72 vjeç, banues në Tiranë të cilët ishin pasagjerë. Ndërkohë, policia konfirmon se kanë humbur jetën, po ashtu Tetiana Fediaieva, 48 vjeçe, banuese në Ukrainë dhe Olesandr Fediaieva, 53 vjeç, banues në Ukrainë.
