Detaje të reja kanë dalë nga ngjarja e rëndë që tronditi fshatin Postribë të Shkodrës, ku 33-vjeçari Ramazan Mataj u gjet i vrarë me breshëri kallashnikovi mëngjesin e djeshëm.
Viktima, baba i tre fëmijëve, dyshohet se u ekzekutua me pritë teksa kthehej në shtëpi.
Një banor i zonës konstatoi trupin dhe njoftoi policinë, e cila mbërriti në vendngjarje pas rreth 8 orësh.
Nga hetimet paraprake rezulton se ndaj viktimës është qëlluar me dy armë automatike.
Sipas informacioneve, pista kryesore e hetimeve lidhet me një marrëdhënie dashurie që Mataj dyshohet të ketë pasur.
Autori i ka zënë pritë viktimës rreth 1.2 km larg banesës së tij. Për të ndjekur gjurmët e autorit, policia ka përdorur një qen gjurmues të specializuar, i cili i ka çuar forcat e rendit deri në një pikë të caktuar, ku pista është ndërprerë.
Babai i viktimës deklaroi për mediat se kishte komunikuar më herët me të birin dhe nuk kishte dijeni për ndonjë konflikt që mund të çonte në këtë tragjedi.
Hetimet po vazhdojnë për të zbuluar rrethanat dhe motivet e plota të ngjarjes.
