Kryetari i Bashkisë Tiranë, Erion Veliaj, nuk lë rast pa vizituar çfarë kantieresh, madje dhe nga dy-tri herë nëpër të njëjtën rrugë. Por, kryebashkiaku sapo ‘pret shiritin’, harron të kthejë kokën edhe pas.
I tillë është rasti më i fundit për një denoncim që vjen tek Gazeta Reforma, tek Komuna e Parisit. Në një rrugë që bashkia po punon, pas rikonstruksionit, u shtruan edhe trotuaret. Por, shiu i parë nxorri zbuluar cilësinë e punimeve.
Shiu që ra vetëm pak ditë më parë, ka sjellë prishjen e disa pjesëve të trotuarit, duke e bërë një sfidë më vete kalimin për qytetarët, e për më tepër për të moshuarit apo prindërit me karroca e fëmijë të vegjël.
Akoma më shqetësuese situata kur bie shi, dhe këto gropa mbushen me ujë, e në disa raste nuk dallohen nga vështrimi i shpejtë. Tregtarët aty pranë kanë filluar të vendosin arka apo shenja të tjera sinjalizuese, për kalimtarët që të mos bien.
Përmbytje edhe tek Lulishtja Çajupi
E njëjta histori ndodh edhe tek Lulishtja Çajupi, përballë ish-Ekspozitës, dhe pranë stadiumit “Selman Stërmasi”. Rreth një vit më parë, lulishtja ishte tërësisht në rregull dhe qytetarët e përdornin për shplodhje, por Veliaj vendosi ta fuste në rikonstruksion.
Përveç shpenzimit të parave të panevojshme, e bëri më keq se sa ishte. Në ditët me shi, aty vihen re lehtësisht pellgjet me ujë që krijohen në vendet për kalimin e banorëve. Përveç ujit, krijohet edhe baltë që e bën të pa aksesueshëm kalimin në park.
/GazetaReforma.com/
