Sektori i pronave të paluajtshme (real estate) është i vetmi, përveç bujqësisë që ka pësuar rritje gjatë pandemisë. Duke folur në Komisionin parlamentar për Veprimtarinë Prodhuese, Tregtinë dhe Mjedisin, Ministrja e Financave dhe Ekonomisë, Anila Denaj, ofroi nje tablo të ekonomisë gjatë këtij viti. Ajo ishte thirrur të raportonte mbi projektligjin “Për buxhetin e shtetit 2021”.
“Nga optika e kërkesës agregate, në gjysmën e parë të vitit 2020, vlerësohet se të gjithë komponentët e saj kanë pësuar rënie duke reflektuar kështu një tkurrje të fortë të rritjes ekonomike. Ndërsa nga pikëpamja e ofertës agregate, me përjashtim të sektorit të bujqësisë dhe atij të pasurive të paluajtshme, të cilët kanë pasur një rritje pozitive gjatë 6-mujorit të pare, me respektivisht 3% dhe 4.2%, të gjithë sektorët e tjerë të ekonomisë kanë pësuar rënie”, deklaroi Denaj.
Disa prej tyre nga më të rëndësishmit janë: tregtia me -16.1%, ndërtimi me -13.8%, industria me -8.7%.
Ndërkohë, tkurrja e mprehtë e aktivitetit ekonomik është reflektuar në një masë të konsiderueshme në tregun e punës. Konkretisht papunësia regjistroi 12.5% në tremujorin e dytë të vitit 2020.
Ndërkaq, kanë rënë të ardhurat nga turizmi dhe dërgesat e emigrantëve.
“Pozicionin i jashtëm i ekonomisë, i cili ende mbetet relativisht solid. Ka një zgjerim të deficitit të llogarisë korrente, kryesisht për shkak të tkurrjes së fortë të flukseve hyrëse tipike nga turizmi, eksportet e mallrave dhe gjithashtu një rënie të ndjeshme të remitancave.
Sidoqoftë, ky zgjerim i deficitit të llogarisë korrente ka qenë relativisht i përmbajtur, kompensuar kryesisht nga frenimi i flukseve dalëse dhe kjo përfshin kryesisht importet e mallrave dhe gjithashtu në një masë të konsiderueshme edhe frenimi i “importit të shërbimeve turistike”, deklaroi Ministrja Denaj.
/GazetaReforma.com/
