Policia e Tiranës ka arrestuar dy shtetas, D.D., 40 vjeç dhe P.G., 28 vjeç, pasi shisnin kokainë dhe kanabis në afërsi të një shkolle dhe fshihnin lëndët narkotike në një lavazh që ishte në pronësi të D.D.
Gjatë kontrollit, u gjetën dhe u sekuestruan 220 doza kanabisi, 20 doza kokainë, një armë të ftohtë, para të përfituara nga shitja e lëndës narkotike, 2 peshore elektronike dhe 2 celularë.
Po ashtu, u procedua penalisht edhe K.L., 19 vjeç, i cili kishte blerë kanabis nga D.D. Çështja është dërguar për hetime të mëtejshme në prokurori.
Njoftimi:
Komisariati i Policisë Nr. 3, në vijim të operacioneve të njëpasnjëshme të zhvilluara për parandalimin, evidentimin dhe goditjen e veprimtarisë kriminale në fushën e narkotikëve, bazuar në inteligjencën informative për një rast të shitjes së lëndëve narkotike, organizuan dhe finalizuan operacionin policor të koduar “Interruption”.
Si rezultat i operacionit u arrestuan në flagrancë shtetasit: D. D., 40 vjeç dhe P. G., 28 vjeç, të dy banues në Tiranë.
Nga veprimet hetimore dyshohet se këta shtetas shitnin doza të lëndëve narkotike kokainë dhe kanabis, në afërsi të një shkolle, dhe se lëndën narkotike e fshihnin në ambientet e një lavazhi në përdorim nga shtetasi D. D.
