Ministrja Ogerta Manastirliu, në prag zgjedhjesh elektorale, e ka cilësuar si arritje ardhjen e vaksinave ruse “Sputnik”.
Pas refuzimit dhe cilësimit si provokim të ofertës së Rusisë nga kryeministri Edi Rama, sot dhurimi i 10 mijë dozave nga Princi i Emirateve të Bashkuara është përmendur si arritje e radhës së kësaj qeverie.
“Kur them provokim nuk po i paraprij ndonjë demarshi pranë shtetit rus, sepse ky është një provokim qesharak dhe nuk është mirë që një vend serioz të bëhet qesharak përmes këtyre lloj postimeve.”, mësohet të ketë thënë kryeministri tre muaj më parë.
Gjithashtu në seancën e sotme parlamentare, Manastirliu tregoi dhe objektivin e qeverisë për planin e vaksinimit. Me shifra të ‘fryra’ në prag zgjedhjesh, ministrja bëri të ditur se kur të nisë procesi në gjithë popullsinë, synimi është që të vaksinohen 15 mijë persona në ditë.
“Objektivi është që të fillojmë shtrirjen e vaksinimit masiv. Po punojmë që edhe kapacitetet tonë ti kemi të parapërgatitur që kur të fillojë vaksinimi, ne të aplikojmë deri në 15 mijë vaksinime në ditë.”, u shpreh ajo.
Lidhur me premtimin e madh të ministres, sjellim në vëmendje mungesën e theksuar të vaksinave. Me hapat e ngadaltë dhe furnizimin e pakët me vaksina, nuk është përmbushur ende objektivi i vaksinimit të plotë të tre grupeve të veçuara si më të rrezikuarit, ai i të moshuarve, mësuesve dhe mjekëve.
Gjithashtu dhe ulja e numrit të testimeve, e rrjedhimisht dhe të infektuarve dhe të vdekurve, është bërë me qëllimin e vetëm të fushatës elektorale.
Në të njëjtin qëndrim vijoi dhe Komiteti Teknik, i cili në mbledhjen e fundit nuk ndryshoi masat, duke lejuar më vonë edhe tubimet elektorale. Të gjitha këto për të dhënë siguri se qeveria e ka në kontroll situatën dhe se po “lufton” për gjetjen e vaksinave.
