Policia e Elbasanit ka arrestuar ditën e sotme një pronar lokali në Belsh. Në pranga ka rënë Edmond Çipllaka, i cili akuzohet edhe për trafik të lëndëve narkotike.
Ai shfrytëzonte për prostitucion vajza në ambientet e lokalit dhe shpërndante lëndë narkotike.
Edmond Çipllaka akuzohet për shfrytëzim prositucioni, trafik të lëndëve narkotike dhe fshehje të të ardhurave. Sipas “Dosja.al”, bashkë me 43-vjeçarin janë vënë në pranga edhe 5 vajza të cilat punonin për Çipllakën.
43-vjeçari përdorte lokalin e tij “Tallava Qerosi” si një strofull prostitucioni, në të cilën u gjetën edhe 14.7 gramë kokainë.
Vajzat të cilat u arrestuan sot, nuk u është bërë i ditur identiteti. Ato punon si valltare dhe u bindeshin urdhrave të Çipllakës për shërbime të tjera, brenda apo jashtë lokalit.
Lokali i natës i njohur si “Tallava Qerosi”, ndodhet në dalje të Belshit dhe në rrugën që të çon për në Cërrik.
Por përveç këtij biznesi që nuk rezulton i regjistruar në QKR, gjë që i shton edhe akuzën e fshehjes së të ardhurave 43-vjeçarit, Çipllaka që njihet si ‘Edi Boksieri’ merrej edhe me boks. Ai ka qenë boksier profesionist dhe kohët e fundit i është përkushtuar profesionit si trajner boksi.
Edmond Çipllaka njihet në Fier si miku i besuar i Fatmir Kajollit, biznesmenit që u arrestua në vitin 2016 për trafikim të lëndëve narkotike dhe pjesëmarrje në organizatë kriminale.
Biznesmeni në Fier njihet si një person i fuqishëm edhe ish-anëtar i Këshillit Bashkiak, përfaqësues i Partisë Republikane. ‘Edi boksieri’ përdorte aftësitë e tij në boks dhe zihej me persona të ndryshëm për t’i dalë në mbrojtje Kajollit në çështje të ndryshme.
43-vjeçari ka qenë gjithashtu i akuzuar për ‘shpërdorim detyre’ në kohën që ishte punonjës në kompaninë private “International parking 2011”. Kjo e fundit ishte nën administrim të Fatmir Kajollit dhe Prokuroria e Fierit e dërgoi në gjykatë për gjobitje të qytetarëve.
Çipllaka akuzohej që së bashku me disa punonjës të tjerë dhe në bashkëpunim me Bashkinë Fier kanë abuzuar me kontratën duke detyruar qytetarët që të paguajnë gjoba mbi 10.000 lekë të reja për ‘ parkim të gabuar’. Kjo çështje u hap në vitin 2014 pas denoncimeve të dhjetëra qytetarëve që ankoheshin për abuzimin me gjobat.
