GJIROKASTËR
Policia e Gjirokatrës ka arrestuar dy shtetas, pasi janë kapur me 21 kilogramë drogë të llojit kanabis sativa.
Forcat policore lajmëruan se është arrestuar 48-vjeçari me inicialet DH.K dhe 22-vjeçari K. Mersini. Ata kanë mbushur automjetin me drogë e janë nisur drejt kufirit grek.
Bëhet me dije se dy personat e prangosur kanë dashur që të shfrytëzojnë kaosin në Kakavijë, për të kaluar lëndën narkotike. Ndërsa, u shpall në kërkim shtetasi J.K, i dyshuar si organizator i veprimtarisë kriminale.
Kujtojmë se në pikën kufitare në Kakavijë është regjistruar një kaos i madh makinash të shqiptarëve, për të shkuar në Greqi.
Njoftimi i policisë:
Finalizohet me sukses operacioni antidrogë i koduar “Fluksi”. Sekuestrohen 21 kg cannabis sativa. Vihen në pranga 2 shtetas, si dhe një shtetas tjetër shpallet në kërkim. Në vijim të punës për goditjen e veprimtarisë kriminale në fushën e narkotikëve dhe pas informacioneve të marra në rrugë operative, Policia e Gjirokastrës zhvilloi operacionin antidrogë të koduar “Fluksi”, në kuadër të të cilit u arrestuan në flagrancë shtetasit:
- M., 22 vjeç, banues në fshatin Karjan, Gjirokastër.
Dh. K., 48 vjeç, banues në Kotë, Vlorë.
Arrestimi i shtetasve të mësipërm u bë pasi gjatë mbasdites së djeshme, shtetasi K.M. është kapur në flagrancë duke transportuar me automjetin e tij drejt kufirit Grek, dy çanta brenda të cilave kishte 21 kg lëndë narkotike Cannabis Sattiva si dhe lëndë narkotike e presuar në trajtën e cokollatës, të cilat u sekuestruan në cilësinë e provës materiale.
Nga veprimet e kryera hetimore rezultoi se lëndën narkotike do ta transportonte për në shtetin Grek shtetasi Dh. K. Gjithashtu u shpall në kërkim shtetasi J. K., si organizator i kësaj veprimtarie kriminale. Po kështu gjatë kontrollit të banesës së shtetasit K.M. u konstatuan të kultivuara disa bimë narkotike.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprën penale “Trafikim i lëndëve narkotike” e mbetur në tentativë, e kryer në bashkëpunim, gjithashtu për shtetasin K.M. u referuan materialet dhe për veprën penale “Kultivim i bimëve narkotike”.
