Një ngjarje e rëndë ka tronditur qytetin e Durrësit, ku Majlind Habibi akuzohet se ka shtyrë për vdekje shokun dhe fqinjën e tij, Branko Shkoza, në një kanal ujërash të zeza.
Tragjedia ndodhi më 2 dhjetor 2024 në zonën e Spitallës, pas një konflikti mes tyre për motive të dobëta.
Sipas hetimeve, konflikti u përshkallëzua pasi Habibi dyshonte se Shkoza kishte ngacmuar bashkëshorten e tij.
Pas debatit, autori e ka shtyrë viktimën nga ura, duke e hedhur në kanal. Trupi i pajetë i 33-vjeçarit u gjet më 5 dhjetor, pas disa ditësh kërkime, ndërsa babai i tij kishte raportuar zhdukjen në polici më 4 dhjetor.
Fillimisht, këqyrja e trupit nuk zbuloi shenja dhune, por hetimet e mëtejshme dhe provat shkencore konfirmuan se ngjarja nuk ishte aksidentale.
Autori, i cili tashmë është arrestuar, ka deklaruar se nuk kishte për qëllim të vriste Shkozën, por veproi nën ndikimin e zemërimit. Ai e ka cilësuar reagimin e viktimës si tallës dhe përçmues, gjë që, sipas tij, e nxiti drejt aktit fatal.
Ngjarja ka shkaktuar tensione të mëdha mes familjeve Shkoza dhe Habibi, të cilat janë fqinjë në të njëjtën lagje. Policia ka ndërhyrë për të shmangur përshkallëzimin e konflikteve mes tyre, ndërsa hetimet për zbardhjen e plotë të rrethanave po vazhdojnë.
