Pas dyshimeve se Bujar Leskaj do të largohej nga PD, i menjëhershëm ka qenë reagimi nga selia blu.
Në një njoftim zyrtar, zyra e shtypit të Partisë Demokratike shkruan se zërat për largimin e Leskajt janë shpifje dhe trillime nga kryeministri Edi Rama.
“Lajmi për dorëheqjen e drejtuesit politik të PD në Vlorë Bujar Leskaj është i pavërtetë. Është një shpifje dhe trillim i Edi Ramës. Zoti Leskaj është në krye të detyrës, në udhëheqje të ekipit fitues të PD në qarkun Vlorë,”– thuhet në reagim.
Kujtojmë se mbrëmjen e sotme në mbledhjen që u zhvillua nga PD, u hodhën dyshime se ka pasur debate të forta, ku është përmendur edhe fjala “dorëheqje”.
Bujar Leskaj, drejtuesi politik i qarkut të Vlorës, mendohej se kërkoi dorëheqjen nga posti që ai drejton, nga fushata elektorale si dhe nga vendi i parë si kandidat për deputet.
Shkak ishin emrat në listën e partisë së djathtë të miratuar nga Kryesia, për të cilat deputeti dyshohej se shfaqi pakënaqësi. Arsyeja, sipas zërave dyshues, ishte fakti se në këto lista u vendosën emra të panjohur për qytetin, të cilët deri tani s’kanë dhënë asnjë kontribut.
Dorëheqja sipas burimeve kishte si motiv ndryshimin e listës për Vlorën ose në të kundërt ai do të tërhiqej me motivacionin se ‘nuk mund të merrte pjesë në zgjedhje me emra që qyteti nuk i njeh dhe nuk i voton’.
Ende asgjë e konfirmuar dhe pritet vendimi ditën e nesërme për të parë në detaje zhvillimet.
