Detaje të reja janë zbuluar në lidhje me ngjarjen e ndodhur mëngjesin e ditës së djeshme në Trieste të Italisë ku mbetën të plagosur tetë persona, ku dy prej tyre mësohet se janë në gjendje të rëndë shëndetësore. Mediat lokale kanë raportuar se ngjarja ka ndodhur rreth orës 08:00 të mëngjesit, ku janë dëgjuar të shtëna pranë një lokali dhe ishin pikërisht këmbësorët e rastit ata që njoftuan ambulancën dhe autoritetet e policisë. Mësohet se deri më tani janë arrestuar dy persona.
Falë informacioneve të marra mësohet se mosmarrëveshja ka ndodhur mes dy familjeve ku ishin shqiptarë të Kosovës dhe Shqipërisë.
Ka qenë një kontratë ndërtimi ajo që ka nxitur grindjen mes dy familjeve, pasi njëra kishte kryer një vjedhje nga tjetra, duke qenë se personat e përfshirë në ngjarje ishin të punësuar në sektorin e ndërtimit.
Rivaliteti mes dy familjeve arriti kulmin duke i “vënë kapakun” me të shtënat që ndodhën në lokal. Më para ishin paraqitur në Prokurori disa ankesa për kërcënime dhe përndjekje të cilat kishin rezultuar në procedim penal. Dosjet e lidhura deri më tani do të skanohen për të hetuar mbi situatën e ndodhur.
Kujtojmë që fillimisht grupet, të cilët besohet të kenë qenë shumë persona janë përleshur me sende të forta dhe më pas dikush ka nxjerrë armën dhe ka qëlluar. Ndërkohë e gjithë zona është bllokuar nga policia dhe kanë nisur hetimet.
