Një sherr për motive pronësie është përshkallëzuar në përdorim dhune ndërmjet disa personave, ku tre prej tyre janë arrestuar dhe një grua është proceduar penalisht.
Ngjarja ka ndodhur në Sukth të Durrësit, ku pas një sherri ndërmjet familjarëve për motive pronësie, personat e arrestuar kanë ushtruar dhunë ndaj njëri-tjetrit, fatmirësisht nuk ka të lënduar rëndë.
Nuk është hera e parë që pjesëtarë familjesh përplasen për prona, madje në shumicën e rasteve ka pasur edhe konflikte që kanë shkuar deri në plagosje apo vrasje. Por fatmirësisht, ngjarja në Durrës ka qenë pa të plagosur apo të vdekur.
Materialet i kanë kaluar Prokurorisë së Rrethit Gjyqësor Durrës, për veprime të mëtejshme hetimore.
Njoftimi i policisë së Durrësit:
Specialistët për Hetimin e Krimeve në Komisariatin e Policisë Durrës, në vijim të punës për parandalimin e përshkallëzimit të dhunës në familje, arrestuan në flagrancë për veprën penale “Dhuna në familje”, shtetasit F. B., 60 vjeç, K. B., 67 vjeç (vëllezër) dhe K. B., 24 vjeç, si dhe kanë proceduar penalisht shtetasen S. B., 52 vjeçe, pasi në Sukth, gjatë një konflikti për motive pronësie kanë ushtruar dhunë ndaj njëri-tjetrit.
Materialet i kaluan Prokurorisë së Rrethit Gjyqësor Durrës, për veprime të mëtejshme”, shkruhej në njoftimin e policisë së Durrësit.
