Një konflikt mes dy vëllezërve në fshatin Goriçan të Beratit ka degjeneruar në përdorimin e armëve të zjarrit, duke shkaktuar panik në mesin e banorëve.
Policia njofton se Leonard Tafa, 33 vjeç, pas një sherri me të vëllanë, ka marrë kallashnikovin dhe ka qëlluar disa herë në ajër.
Forcat e policisë kanë mbërritur menjëherë në vendngjarje dhe kanë arrestuar Tafën, duke parandaluar një incident të mundshëm kriminal.
Njoftimi i Policisë:
Finalizohet operacioni policor i koduar “Telefonata”, si rezultat i bashkëpunimit të ngushtë me qytetarët, për parandalimin e një ngjarje të mundshme kriminale, në familje.
Në mesnatë, qëlloi me kallashnikov në ajër, në afërsi të banesës së tij, pasi u konfliktua me vëllanë, vihet në pranga 33-vjeçari.
Menjëherë pas njoftimit nga disa shtetas, se familjari i tyre po qëllonte me armë zjarri në ajër, në afërsi të banesës, shërbimet e Stacionit të Policisë Dimal kanë organizuar punën dhe kanë shkuar në adresën e dhënë, në fshatin Goriçan.
Si rezultat i ndërhyrjes së menjëhershme dhe i veprimeve profesionale të shërbimeve të Policisë, në kuadër të operacionit “Telefonata”, u neutralizua autori, shtetasi L. T., 33 vjeç, i cili dyshohet se duke qenë në gjendje të dehur, ishte konfliktuar me vëllanë e tij, dhe më pas kishte qëlluar me kallashnikov në ajër, në afërsi të banesës. Vijojnë kërkimet për gjetjen e armës.
