Policia e Tiranës ka arrestuar ditën e sotme tre persona të cilët u përfshinë në sherrin e dhunshëm me thika e shkopë bejzbolli në rrugën “Dritan Hoxha” para dy ditësh.
Në këtë sherr janë përfshirë 6 persona ku polica ka arrestuar shtetasit Besim Sokolaj, 44 vjeç, Shkëlqim Sokolaj 48 vjeç (vëllezër) dhe Edmond Gosturani 25 vjeç, pasi dhunuan shtetasin Xhuljo Musën dhe lanë të plagosur shtetasin Marvano Qerimin.
Ka qenë Xhuljo Musa i cili ka bërë denoncimin në polici.
Njoftimi i plotë i policisë
“Policia parandalon përshkallëzimin e mëtejshëm të një konflikti mes disa personave.
Përdorën sende të forta gjatë konfliktit, arrestohen në flagrancë 3 shtetas.
Specialistët për Hetimin e Krimit në Komisariatin Nr. 3, pas njoftimit të marrë për një konflikt të çastit në rrugën “Dritan Hoxha”, ku tre shtetas, për motive të dobëta, në bashkëpunim me njëri-tjetrin, gjatë konfliktit kanë goditur me mjete të mprehta dhe sende të forta shtetasit Xh. M. dhe M. Q. dhe D. M., duke i shkaktuar dëmtime në pjesë të ndryshme të trupit, kanë reaguar në mënyrë të menjëhershme, duke parandaluar përshkallëzimin e mëtejshëm të konfliktit.
Pas një pune të mirorganizuar është bërë e mundur kapja dhe prangosja e shtetasve:
S., 44 vjeç, Sh. S., 48 vjeç dhe E. G., 25 vjeç, të tre banues në Tiranë.
Në cilësinë e provës materiale u sekuestrua mjetin prerës (thikë) që përdorën autorët.
Materialet i kaluan Prokurorisë së Rrethit Gjyqësor Tiranë, për veprime të mëtejshme”.
