Kryeministri Edi Rama, ishte i pranishëm ditën e sotme në qendrën shëndetësore të ndërtuar në Vorë.
Shefi i qeverisë ishte i shoqëruar nga ministrja e Shëndetësisë, Ogerta Manastirliu.
Rama tha se Vora do të pësojë shumë ndryshime pas tërmetit të 26 nëntorit.
Më tej ai u ndal edhe te shërbimet online, të cilat do të shmangin sportelet.
Kreu i qeverisë tha se pavarësisht se shërbimet kthehen online, askujt nuk i cenohet vendi i punës.
Sipas tij, ata që merreshin deri dje me pritjen e qytetarëve, do të japin kontributin e tyre në sistemin online.
Ndër të tjera kryeministri premtoi se në Vorë do të ndërtohet diçka e bukur, por nuk dha shumë detaje.
“Kam qenë më parpara këtu dhe ka qenë katastrofë. Në Vorë mrekullia vet do të jetë rindërtimi, pasi ka shumë godina për t’u shembur. Do bëjmë një gjë shumë të bukur në Vorë. Pra kjo është karta e shëndetit, me vulën elektronike, me të cilën keni bërë 60 mijë udhëtime. Ta harrojnë tani. Nuk ka nevojë më për këtë. Mjafton që ju të vini tek mjeku dhe ai e bën vet këtë punë. “S’kam kartë, nxirre kartën, ku e ke, shko merre. Na doli, s’na doli”, këto s’vlejnë më. Mbaje këtë (i drejtohet një qytetar, duke i dhënë një kartë) ta kesh si kujtim nga Edi Rama. Pra radha në qendra shëndetësore, ishte më shumë për rinovimin e kartave. Ata (punonjësit) nuk do të ikin nga puna. Ata tani do të bëjmë më shumë punë. Recepsionistët dhe sportelistët nuk do të pushohen nga puna. Ju do të jeni këtu për ndihmuar këtë sistem online.”, tha Rama.
