Portalet qeveritare në Shqipëri ranë pre e një sulmi kiberentik, teksa u krijuan shmë problematika.
Deputeti i LSI-së, Petrit Vasili i është drejtuar AKSHI-t me një kërkesë për informacion lidhur me shërbimet publike online.
Vasili ka publikuar në rrjetin e tij social Facebook, letrën e dërguar AKSHI-t ku i kërkon informacion nëse është identifikuar agresori që ka kryer sulmin kibernetik dhe nëse janë fshirë apo kopjuar të dhëna nga databaza e këtij institucioni.
Sipas Vasilit, gjendja paraqitet tepër e rëndë me shërbimet publike online dhe miliona të dhëna gjenden në kaos dhe me mundësi shfrytëzimi për qëllime kriminale.
“Si deputet i jam drejtuar me Kerkese Zyrtare per Informacion drejtueses se AKSH-it lidhur me sherbimet publike on line.
Gjendje paraqitet teper e rende me sherbimet publike on line dhe miliona te dhena gjenden ne kaos dhe me mundesi shfrytezimi per qellime kriminale.
Qindra milion euro te shpenzuara per digitalizimin sherbimeve publike dhe sistemi on line u shemb ne pak ore dhe kjo eshte pak te thuash skandal shume i rende dhe praktikisht renie e shtetit”, shkruan Vasili.
Kujtojmë që Agjencia Kombëtare e Shoqërisë së Informacionit nëpërmjet një njoftimi në faqen zyrtare ka bërë me dije se si pasojë e sulmeve kibernetike të kryera së fundmi, do të kryhej një operacion për mirëmbajtjen e sistemeve të institucioneve publike.
Në njoftim thuhet se kjo mund të sjellë vështirësi në aksesin e qytetarëve në faqet qeveritare.
“Agjencia Kombëtare e Shoqërisë së Informacionit u bën me dije qytetarëve shqiptarë se sot në orën 14:00 deri në 23:59 do të kryejë një operacion mirëmbajtje të sistemeve dhe faqeve zyrtare të institucioneve publike.
Kjo ndërhyrje në vazhdën e përballjes me pasojat e sulmit kibernetik, do t’i shërbejë përmirësimit të mëtejshëm në dhënien e shërbimeve publike online. Kërkojmë mirëkuptimin e të gjithëve nëse gjatë ditës së sotme mund të hasni vështirësi në aksesin e çdo faqeje publike”, shkruhet në njoftimin e AKSHI-it.
Kujtojmë që Portali qeveritar e- Albania u bllokua me datë 17 korrik teksa AKSHI njoftoi që po përballen me një sulm të sofistikuar kibernetik nga jashtë.
Por pas 4 ditësh në gjendje pezull dhe krijimit të shumë problematikave tek aksesimi i shërbimeve nga ana e qytetarëve, erdhi një lajm pozitiv nga Kryeministria. 1118 shërbime elektronike nga 1225 në total u bënë funksionale dhe mund të përdoren nga qytetarët shqiptarë.
Vlen të theksojmë se edhe para sulmit kibernetik, bllokimi dhe vonesat e krijuara nga portali e-Albania kanë shkaktuar penalitete, kosto shtesë, kaos dhe vështirësi të panumërta.
