Një tjetër reagim kundër ka ardhur pas vendimit të qeverisë për shembjen e maternitetit “Mbretëresha Geraldinë”.
Unioni i Arkitektëve, Urbanistëve dhe Planifikuesve të Shqipërisë e ka kritikuar ashpër shembjen e godinës, duke vënë në dukje se ndërtesa ishte me rëndësi historike sa i përket periudhës së modernizimit të kryeqytetit.
Gjithashtu, në njoftimin e nxjerrë nga “AUA”, u vu në dukje dhe mungesa e instuticioneve shtetërore që janë kompetente për mbrojtjen e trashëgimisë.
“Kjo ndërtesë historike – ashtu si Parku, Stadiumi, Teatri dhe shumë vila të viteve 20/30të – përfshihet në fondin e objekteve me status special dhe/ose monument kulture, dhe i përkasin një periudhe mjaft interesante të modernizimit të kryeqytetit.”, thuhet në njoftim.
Kujtojmë se prishja e godinës “Mbretëresha Geraldinë” është një veprim antiligjor, pasi godina është shpallur monument kulture e kategorisë së dytë, vendim që është marrë që më 5 mars të vitit 2007.
NJOFTIMI NGA AUA
Komuniteti profesional dhe AUA – Unioni i Arkitekteve, Urbanisteve dhe Planifikuesve të Shqiperisë, shprehin keqardhjen e madhe dhe protestën e tyre të vazhduar për mënyrën aspak profesionale dhe të përsëritur se si po kryhet ndërhyrja e rikonstruksionit në ndërtesën e radhës historike të Tiranës, maternitetit historik “Mbretëresha Geraldinë”.
Kjo ndërtesë historike – ashtu si Parku, Stadiumi, Teatri dhe shumë vila të viteve 20/30të – përfshihet në fondin e objekteve me status special dhe/ose monument kulture, dhe i përkasin një periudhe mjaft interesante të modernizimit të kryeqytetit.
Autoritet duhet të garantojnë që në fazat e prokurimeve publike që projektimi dhe zbatimi i punimeve të tilla ka ekspertizën dhe kulturën e duhur për ndërhyrje të tilla me karakter thellësisht restaurues, dhe jo të bëhen promotorë të kësaj kulture pune qoftë përmes heshtjes dhe neglizhencës. Aq më tepër që gjithshka ndodh natën, pa transparencë dhe në kushtet e pandemisë.
Mjaft e kritikueshme mbetet edhe heshtja e institucioneve të specializuara publike-shtetërore për mbrojtjen e trashëgimisë, heshtje që i bën ata bashkëpërgjegjës në këtë akt aspak ligjor.
