Në kuadër të projektiti të “Unazës së Madhe” po vazhdon “aksioni” për të shembur të tjera banesa., ku policia dhe IMT kanë shkuar sërish që në mëngjes në lagjen “5 maji”. Banorët kanë bërë rezistencë, por nuk kanë qenë aq të fuqishëm sa të ndalojnë fadromat të cilat tashmë kanë filluar punën.
Në ndihmë të IMT-së në zonë, kanë mbërritur forca të shumta të policisë dhe pritet të shemben rreth 11 shtëpi.
Një moment që bën përshtypje është kur një banor, me certifikatë pronësie në duar, teksa ka hipur mbi mur dhe bën thirrje për të mos i shembur banesën. Pas disa minutash rezistencë ai është larguar me forcë nga policia dhe më pas fadroma ka nisur shembjen e banesës së tij.
Kujtojmë që banorët e 5 Majit dhe jo vetëm kanë zhvilluar protesta të shumta, para Bashkisë së Tiranës si dhe para Kryeministrisë duke kërkuar që banesat e tyre të mos shemben.
Por mesa duket zëri i tyre ka rënë në “vesh të shurdhër dhe tashmë prezenca e fadromave “në aksion” për të shembur banesat e tyre është një realitet i hidhur.
Së fundmi thirrjeve të prindërve të tyre iu janë bashkuar dhe fëmijët që me altoparlant i kanë kërkuar kryeministrit Edi Rama të mos prishë shtëpitë e tyre.
“Xhaxhi Edi të lutem mos na i prish shtëpitë, mezi i kemi bërë. Ne nuk kemi më shtëpi të tjera. Gjithçka mund të ndodhë”, tha një fëmijë dhe të tjerë iu bashkuan thirrjes me zë ndaj kryeministrit.
