Dy ura janë shembur brenda pak orësh në dy rajone të ndryshme të Rusisë, pranë kufirit me Ukrainën, duke shkaktuar të paktën 7 viktima dhe dhjetëra të plagosur.
Lajmi u konfirmua nga autoritetet lokale dhe u raportua nga BBC.
Ngjarja e parë ndodhi në Bryansk, ku një urë rrugore u shemb mbi një tren pasagjerësh. Guvernatori rajonal bëri me dije se disa kamionë ranë mbi vagonët e trenit, duke shkaktuar një bilanc tragjik, 7 të vdekur dhe 47 të plagosur të dërguar në spital.
Sipas “Hekurudhave të Moskës”, shembja dyshohet se ka ardhur si rezultat i një ndërhyrjeje të paligjshme në strukturën e urës.
Vetëm pak orë më pas, një tjetër incident ndodhi në Zheleznogorsk, ku një urë tjetër u rrëzua, duke shkaktuar daljen nga shinat të një treni dhe shpërthimin e flakëve. Makinisti mbeti i plagosur dhe është nën kujdesin e mjekëve.
Guvernatori në detyrë, Alexander Khinshtein, deklaroi se shkaqet e shembjeve janë ende të paqarta dhe se ekipet e emergjencës janë në terren duke hetuar rrethanat.
“Situata është nën vëzhgim të vazhdueshëm”, tha ai.
