Deputeti demokrat Tritan Shehu ka reaguar me forcë lidhur me skandalin ku janë përfshirë mjekët e Onkologjikut në QSUNT, duke e konsideruar atë pasojë të politikave të dështuara dhe anti-humane të regjimit aktual. Në një postim të gjatë, Shehu theksoi se tentativat për të fajësuar mjekët dhe personelin janë një mënyrë për të shmangur përgjegjësinë nga ana e qeverisë.
“Ngjarjet në Onkologji janë pasoje e politikave anti-humane të regjimit,” shkruan Shehu, duke akuzuar se sistemi shëndetësor është vendosur “kokëposhtë” dhe është kthyer në një sistem të varfër dhe anti-social. Ai theksoi se fondet e pakta shkojnë për projektet e partneriteteve publike-private (PPP) të korruptuara, në vend që të përmirësojnë shërbimet për qytetarët dhe pacientët.
Shehu e përshkroi situatën në Onkologji si të mjeruar, ku mjekët dhe pacientët përballen me kushte të papranueshme. “Onkologjia është krejt e amortizuar, mjekët vizitojnë disa në një dhomë, pacientët presin në 40 gradë nxehtësi, kemioterapia vjen me periudha, dhe metodat moderne të trajtimit individual të tumoreve nuk aplikohen,” theksoi ai.
Deputeti demokrat theksoi se këto probleme kanë shkaktuar një amulli të thellë dhe kanë nxitur fenomene korruptive. Ai shtoi se mjekët dhe personeli, të cilët punojnë me pasion dhe devocion, janë viktima të këtij sistemi në kolaps. “Duhet përmbysur ky regjim, sepse ai është shkaktari dhe përfituesi i kësaj katastrofe,” përfundoi Shehu, duke bërë thirrje për ndryshime rrënjësore në sistemin shëndetësor.
Kjo deklaratë e Shehut vjen në një kohë kur skandali në Onkologjik ka tronditur opinionin publik dhe ka ngritur pikëpyetje të mëdha mbi menaxhimin e sistemit shëndetësor në Shqipëri.
