Opozita duket se nuk është në ditët e saj më të mira dhe kjo për një sërë ndodhish, megjithatë tani sytë janë të gjithë të drejtuar nga protesta e paralajmëruar e 16 shkurtit, për të cilën Dashamir Shehi siguron fitore.
Kur flasim për fitore, kemi parasysh fitoren e kauzës që opozita i ka dhënë protestës, rrëzimin e qeverisë dhe krijimin e një qeverie teknike dhe për këtë kreu i LZHK-së nga studio e “Kjo Javë” ka thënë se do të realizohet.
Shehi ka thënë se Rama po sulmohet sot jo vetëm nga qeveria, por edhe nga strukturat ndërkombëtare, të cilët nuk kanë treguar më interesin e mëparshëm ndaj vendit.
“ Nga 16 shkurti do të varet edhe fati i zgjedhjeve”, ka thënë Shehi.
“Ne duam zgjedhje të lira pas shumë vitesh. Të bëhen në një klimë të re. Ka nevojë për qeveri tranzitore, nga të gjithë partitë që të ketë fuqi të mjaftueshme. Që banditët të mos fusin duart në zgjedhje. Zgjedhjet e lira, janë e vetmja mënyrë në demokraci për t’i shërbyer pushtetit. Do ngulmojmë me forcë që të largohet kryeministri”- tha ai.
Një temë tjetër diskutimi në emision, Dashamir Shehi ka komentuar edhe rreth Kodit të Ri zgjedhor, për të cilin tha se pret ndryshim, pasi ka marrë premtimin nga kreu i PD-së.
“E kemi takuar z.Basha disa herë për këtë punë, është një nga temat kryesore. Kemi marrë premtimin që Kodi do të ndryshojë. Ka shumë rëndësi sistemi i ri që do të prodhojë një marrëveshje politike, formula mund të gjendet gjithmonë politik”- tha Shehu.
