Në emisionin “Open” në News24 u diskutua për zgjedhjet parlamentare të 11 majit 2025 dhe për rolin e partive të reja që do të konkurrojnë në to.
Për herë të parë, në këto zgjedhje, do t’i jepet mundësia diasporës për të votuar.
Nga ana tjetër, spektri opozitar ende nuk ka arritur të bashkohet përballë një mazhorance që synon të fitojë një mandat të katërt qeverisës.
Partitë e reja ose ato të vogla, që mund të dalin të vetme në zgjedhje, mund të konsiderohen si opozita e opozitës, të paktën nga përfaqësues të PD-së.
Por, sa mund të ndikojë kjo ecuri në fragmentimin e votës?
Deputeti Agron Shehaj nga partia Mundësia theksoi se nuk ka dëgjuar asnjë përfaqësues të PD-së që ta quajë partinë e tij si opozitë të opozitës. Ai shtoi se partia do të garojë e vetme në zgjedhjet parlamentare dhe se për Shqipërinë nuk ka asnjë dëm nga dalja e partive të reja.
“Do të shqetësohesha nëse nuk do të krijoheshin parti të reja. Jemi në një situatë ku një pjesë e elektoratit nuk ka besim te partitë e vjetra. PD e vuan më shumë se është në opozitë, ndërsa PS e vuan më pak, pasi duke qenë në pushtet i ka mundësitë t’I mbajë më afër të pakënaqurit”, tha Shehaj.
